Poems (කවි)

 

 

යථාර්ථය

උදේ කාරණකොට
එලියට ආපු
රෑ බත් ඇටයක්
හරිම ගඳයි
අල්ලපු ඇඟිලිත් එක්ක

2013.01.13 My Life  

 

මචං

කවියක් ලියන්න මචං
ඉස්පාසුවක් නැ මචං
රටට වගේම මචං
ආර්ථිකේ බිංදුවයි මචං
තේ එකක් බොන්න මචං
පිටි සීනි ගාන ඇහුවම මචං
මගෙ සීනි නැග්ගා මචං
අල ළුණු ගාන මචං
ජීවිතේම අල කරා මචං
ලව් කරන්න බැ මචං
හොරෙක් වෙන්න වෙනව මචං
කෙල්ලො කොල්ලො පව් මචං
උන්ට හෙටක් නැ මචං
බුමිතෙල් ගානවත් මචං
අඩුවට තිබ්බනම් මචං
අම්මා පා මචං
ගිනි තියා ගන්නවා මචං
පොඩි කාලේ කාපු පරිප්පු මචං
දැන් කන පරිප්පුවේ හැටියට මොකද්ද මචං
රස්සාවයි පරස්තාවයි ඉවරයි මචං
මට බුදු සරණයි මචං

නිරෝෂනී පීරිස් 2012.12.16

 

නිරුවත

නිරුවතමුදලට පමණක් නොව
ප්‍රේමය වෙනුවෙන්ද විකිනෙයි
වෙනස ඇත්තේ
මුදලට ඇති අගය
ප්‍රේමයට නැති නිසාය

නිරෝෂනී පීරිස් 2012.12.13

නුඹ සිටියානම් 

ඉගිලෙනා සිත ඈත යනවා
ලතවෙනා සිත දරා ගන්නට
එලිය දෙන සඳ නොමැති බව දැන
කනා මැදිරි එළි නෙත් රවටනවා

විසල් අහස යට මා කුහුබුවෙකුය
අවිගත් සේනා ලුහුබැද එනවා
කිරිගරුඩින් තැනු මගේම ප්‍රේමය
සේනාවන් වෙත පාර කියනවා

ඉතිරිව කිසිවක් නැති බව දැන දැන
අපේ මතකයේ සිනහ යදිනවා
නුඹ සිටියානම් මා නෙතු අද්දර
ලොවම දිනන්නට සටන් වදිනවා

නිරෝෂනී පීරිස් 2012.12.13

නැගිටිමි 

ඉතිං මා නැගිටිමි 
කස්තුරි මුවෙකු යැයි
ගජමුතු හස්තියෙකු යැයි
කල්ප රුක්ෂය යැයි
කල්පයක් මිරිගුවම දැක
ඇසෙන උදුරා
සිතින් අතු ගා
ඉතිං මා නැගිටිමි
පැසුණු බුද්දිය
පෙම් ඉගිය මග හැර
ඉතිං මා නැගිටිමි
මගෙ ලොවම අළුකර
මන්ද වූ බුද්දියෙන් සිනාසෙන
නුබලාට මා දිව්රමි
දැවී අළු වී ඉපදෙන
ෆීනික්ස් පක්ෂියෙකු මෙන්
නැවත මා නැගිටිමි

නිරෝෂනී පීරිස් 2012.12.12

මිරිගු ආදරේ ...... 

අමා පිරි හැගුම් මතින්
වෙලී මත් බිගුන් ලෙසින්
සරා සළෙල සිතිවිලි පිපිදු
මිරිගු ආදරේ ......

ප්‍රේමයැයි කියා රැවටී
හදවතින් හැගුම් බිලිදී
සෙල්රුවක් ලෙසින් නොසැලී
ජීවිතය යලිත් කොහේ නැවතී

සිනහවන් පතා පැමිණි
කදුළු ගෙන යලිත් නැවතී
යනෙන මන් කොහේ නොදනී
දෛවයෙන් ලැගුම් සොයමි

නිරෝෂනී පීරිස් 2012.12.04

සිහින හිමි හංසයා

ප්‍රේමයේ මායාවේ
නුඹයි මා දුටු සිහින හිමි හංසයා
අරුණ තෙපලන මොහොතේ
පිනි දියෙන් සැදු සිහින හිමි හංසයා

ගීතයක තනු හැඩවෙයි
ඒ නුඹම යැයි,නුඹේ හඩයැයි මට ඇසෙයි
පද වැලක කවි ලියවෙයි
ඒ නුඹෙන් විදි රසය යැයි මට හැගවෙයි

නෙත් පියා විදි සුවය යලි යලී ලං වෙයි
සිත් පුරා නුඹ තැවරිලා සිත මත් වෙයි
පෙම්වත් කතාවක් අසන්නට නෙත් ඇහැරෙයි
අරුණ සමගින් බොදව ගිය නුඹ සිහිනයක් බව සිහිවෙයි

නිරෝෂනී පීරිස් 2012.12.03

සිමින් නමුත්

සිමින්
නමුත්
හරි හදිස්සියෙන්
මතකද
ආදරෙයි කියන්නට
මා ඉක්මන් උණු හැට්යි
සිමින්
නමුත්
හරි හදිස්සියෙන්
මතකද
මම නුඹෙම වෙන්න ආ හැටි
සිමින්
නමුත්
හරි හදිස්සියෙන්
මතකද
නුඹ මගෙ අතීතේ සෙව් හැටි
සිමින්
නමුත්
හරි හදිස්සියෙන්
මතකද
නුඹට මා කෙනෙක් නො වූ හැටි
සිමින්
නමුත්
හරිම ඉක්මනින්
සිමින්

නිරෝෂනී පීරිස් 2012.12.01

මහළු හැගුම්

ගං දෑල තරුණයි නම්
මහසයුර තරුණයි නම්
සඳ තවම තරුණයි නම්
කිම මගෙ මෙසේ ප්‍රේමය කෙසේ
මහළුව ගියේ //

රත් පැහැ දෙතොල්
පැහැබර නුවන්
හැඩකාර පෙනුමන්
කවදා කෙසේ දො කෙලෙස දෝ
නැවතුනේ

ප්‍රේමය අනන්තයි
දෑතට නොඇල්ලෙයි
නුබෙ හද නුරා ලොල්
ප්‍රේමය නොවෙයි ඒ හැගුම් මයි
මහළුව ගියේ //

නිරෝෂනී පීරිස් 2012.11.28

නොදකිනා හැටි

මා හදවත ලියවෙනා
දහසක් පෙම් කවි
දහසක් දෙන බලා සිට්යි
නුඹ නොදකින හැට්යි

දෙනෙතින් බොර පැහැ කදුලැලි
මා සලනා හැට්යි
බොහෝ දෙනා දැක හිනැහෙයි
නුඹ නොදකින හැට්යි

වාරු නොමැති මා ජිවය
විසිරී යන හැට්යි
දැක දැක නුඹ අහක බලයි
අදහන්නට බැරි

නිරෝෂනී පීරිස් 2012.11.26

නුඹ හමු වනතුරු

නුඹ හමු වනතුරු
ප්‍රේමය මෙය යැයි
රාගය මෙය යැයි
ජිවය මෙය යැයි
සෙනෙහස මෙය යැයි
සිනහව මෙය යැයි
මා දැන නොසිටිමි
නුඹ යලි යන තුරු
මා පමණක යැයි
කාලය මෙය යැයි
තනිකම මෙය යැයි
කදුල උරුම යැයි
නුඹ ඇගේම යැයි
මා දැන නොසිටිමි

නිරෝෂනී පීරිස් 2012.11.2

නුඹ එනතුරු

පින්න මල් පිපුණු දවසක
හීන මල් ගොඩක් අරගෙන
ඕලු මල් මිටක් දෙන්නට
කවදද සඳ එන්නේ

පිච්ච මල් කපුරු සුවදට
ඉද්ද මල් යහනෙ වැතිරී
රෝස මල් සුවය විදිනට
මග බලාන ඉන්නේ

නාමලක් ගසා වරලස
තුබ මලින් මසා ඔසරිය
කල්ප මල් දමක් ගොතනට
නුඹ එනතුරු ඉන්නේ

නිරෝ 2012.10.9

විපත 

ආරාධනාවක්
නැතුව ඇවිත්
කොයිතරම්
සුභ පතනවද
මගේ
මළගමට

නිරෝ 2012.10.05

නුඹ ළග නෑ

තරු බොදවී ඇයි මේඅද
සඳ නොපෙනෙයි ඇයි මේඅද
ලොව නිහඩයි ඇයි මේඅද
නුඹ ළග නෑ ඇයි එඅද

නුඹ සඳ මෙනි තරු පිරි මැද
මා දුහුවිලි මෙනි පෑගෙන
අපි ඒ මග දැන නොම දැන
ආ දුර දුර වැඩ්යි සබද

මා නොමදුටු හුදකලාව
අද මිතුරෙකි ළග ගැවසෙන
අතොරක් නැති වේදනාව
හද කම්පන වී ගෙනාව

මේ මිහිමත තුල පස්වන
මා නොපෙනී යන දිනයක
නුඹ ඇවිදින් හදිස්සියෙන්
හෝ මා දැක යලි යනු මැන

නිරෝ 2012.10.03

සඳ සාක්කි

මම බලා උන්නා
ඇය කිරි සිනහ සැලුවා
මම බලා උන්නා
ඇය මලක්සේ පිපුණා
මම බලා උන්නා
ඇය මවක් වූවා
මම බලා උන්නා
ඇය මුලා වූවා
මම බලා උන්නා
ඇය තනිමගක උන්නා
මම බලා උන්නා
ඇය කදුළු සැලුවා
මම බලා උන්නා
ඇය බොහොදුරක වූවා
මම බලා උන්නා
ඇය මංමුලා වූවා
මම බලා උන්නා
ඇය යලිත් ආවා
මම බලා උන්නා
ඇය දරා උන්නා
මම බලා උන්නා
ඇය බලා උන්නා
මම
ඇය
අපි
අපි ඔහේඋන්නා
මම බලා උන්නා
ඇය …………………………

නිරෝ 2012.10.01

ජුදාස්ගේ පැහැදිලි කිරීම

මා නුඹට කිසිවිටක
නොකලෙමි වරදක්
නුඹව ඔසවාලන්ට
මමයි කරගහගත්තේ
කුරුසයක්

අද නුඹට පේනවා ඇති
එක පතේ බත් කාපු
එක පැදුරේ නිදියාපු
එකට බොහොදේ කරපු
මිනිසුන්
පාවාදෙන
අරුම
හිතට
හිතු හිතූ
මනාපෙට

නිරෝ 2012.9.30

මගේ සඳ

සුපුන් සඳ ඇවිත් අද යලි
එබී මගෙ පැලට ලංවී
සොයයි මගේ සඳ සිටී දැයි
එදා මෙන් වේලි මගෙ ළග

සඳේ ඇයි ඉතිං සරදම්
යහන මගෙ මෙසේ තනිනම්
නුඹට කාරි කීම තනි මං
සිටීනම් මඟ බලා හැම කල්

නුඹ තරම් දුරින් සිටියත්
ඔහු එතැයි හනික දැන් දැන්
නුඹේ ඔය සිනහ අරගන්
මගේ සඳ දකී නැති නම්

නිරෝෂනි පීරිස් 2012.08.02

කෙලෙස යන්නද නුඹ හැර

නැවතී දිශාවක
ඔහේ පාවෙන සිතුවිලි මැද
මිලානව යන හිරු දැක
මගේ සිත කල්පනාවක

දිනක් නවතියි පෙර ලෙස
නුඹ හිඳියි මා නෙතු මත
තවත් මොහොතින් සමුගෙන
කෙලෙස යන්නද නුඹ හැර

හමා එන මද නළ ලෙස
තරඟ වදිනා රළ ලෙස
හදෙහි සිතුවිලි එක පිට
දුක ගෙනෙයි මා වට කොට

දමා යන්නට මොහොතක
නුඹේ දසුනින් මේ ලෙස
නොහැකි වන්නට කිසි දින
නවා තැන නුඹ වනු මැන

නිරෝෂනි පීරිස්  2011.03.01

ලොවක් දිනා

සඳ තරු මල් ඇහිඳ ඇහිඳ
දේදුන්නේ හැඩ බල බල
පුංචි පුංචි හීන අරන්
මගේ පුතා ලොකු වෙන්නයි


ඔබේ දිලිසෙන දිගු නෙත් යුග
පුංචි පතුල් පා පොඩි දෙක
අද වගේම ඒ දවසෙත්
හොඳ දේවල් දිනන්නටයි

හොඳ මිනිසෙකු විලසින් නුඹ
ලොවක් දිනා හෙට එන කළ
නුඹේ මුවින් ඒ දවසෙත්
අම්මේ කියා අසන්නටයි

නිරෝෂනි පීරිස්  2012.01.16